ऐतिहासिक निर्णय: मिटर ब्याज सम्बन्धी विधेयक पारित

श्रावण १ सोमबार,२०८०/काठमाडौं-

मिटरब्याजमा समलग्न ब्यक्तिहरुलाई कार्वाही गरेर पीडितलाई न्याय दिने हेतु ल्याइएको विधेयक प्रतिनिधिसभाबाट सर्वसम्मत पारित भएको छ।

आइतबार बसेको प्रतिनिधिसभा बैठकले मुलुकी संहितासम्बन्धी केही ऐनलाई संशोधन गर्ने विधेयक पारित गरेको छ।

बैठकमा कानुन, न्याय तथा संसदीय मामिलामन्त्री धनराज गुरूङले ‘मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८० लाई पारित गरियोस्’ भनी गरेको प्रस्ताव सर्वसम्मतिले पारित भएको छ। सरकारको ऎतिहसिक निर्णयको रुपमा हेरिएको उक्त विधेयकमा तोकिएभन्दा बढी ब्याज लिइएको पाइए ७ वर्षसम्म कैद र ७० हजार जरिवानाको व्यवस्था छ।

साथै, अनुचित लेनदनेको क्रममा ऋणीबाट रकम वा चलअचल सम्पत्ति लिएको देखिएमा पीडितलाई त्यस्तो रकम वा सम्पत्ति बराबरको रकम भराइदिनुपर्ने व्यवस्था रहेको छ।

यसअघि राष्ट्रिय सभाबाट उक्त प्रतिस्थापन विधेयक पारित भए पनि ६० दिनभित्र प्रतिनिधि सभाबाट पारित हुन नसक्दा अध्यादेश निष्क्रिय भएको थियो। अबेर साँझसम्म चलेको बैठकबाट सरकारले सोही प्रतिस्थापन विधेयकलाई संशोधन सहित पारित गरेको हो।

संशोधन भएका विषय अब राष्ट्रिय सभामा पेश हुनेछन्। त्यसपछि राष्ट्रियसभा अध्यक्षले प्रमाणीत गरेर राष्ट्रपति समक्ष पेश गर्नु पर्ने हुन्छ। राष्ट्रपतिले प्रमाणीकरण गरेपछि विधेयक कानुन बन्नेछ।

केही समय अघि मिटरब्याज पीडित मधेश लगायतका स्थानहरूबाट पैदल आएर राजधानीमा धर्ना दिएका थिए।

प्रकाशित मिति : २०८० साउन १ गते सोमबार